Gögn um gögn frá gögnum til terabæts

Eftir Berg Kristinsson, sérfræðing hjá Tæknivali hf.

Upplýsingar á rafrænu formi hlaðast upp allt í kringum okkur. Tölvupóstur, skráarsöfn og gagnagrunnar tútna út og valda kerfisstjórum fyrirtækja ómældum áhyggjum. Öll gögn þarf að geyma einhvers staðar og öll gögn verður að afrita því ekki viljum við tapa þeim. Tiltekt í gagnasöfnum og tölvupóstkerfum koma sjaldnast til greina því þetta eru jú allt upplýsingar og upplýsingar gætu komið að notum síðar. En eru öll þessi gögn jafn verðmæt og þurfum við jafn öruggt aðgengi að þeim öllum? Fæst fyrirtæki velta fyrir sér á hvers konar miðlum allar þessar upplýsingar eru geymdar og það er venjan að stækka geymslusvæði netjóna eftir þörfum án þess að spá í hvað er verið að geyma. Öll gögn hafa nefnilega sitt æviskeið hvort heldur um er að ræða tölvupóst, bankafærslu eða röntgenmynd og mikilvægi þeirra breytist með aldrinum. Gögn geta breyst, verið endurnýtt á meðan önnur mega ekki breytast sökum eðli síns. Það er mismunandi hversu „einstakar“ upplýsingarnar eru og hversu erfitt er að nálgast þær aftur ef þær tapast.

Samkvæmt könnun sem EMC gerði má ætla að 80% þeirra gagna sem geymd eru á skrárasvæðum netþjóna séu nánast ónotuð og að sama skapi eru 0,6% líkur að leitað sé í tveggja mánaða gömlum tölvupósti. Allar upplýsingar taka pláss og allar upplýsingar eru afritaðar reglulega. EMC hefur í nokkur ár einbeitt sér að því að gera þær aðferðir, sem við notum til að geyma upplýsingar á gagnageymslukerfum, skilvirkari og afkastameiri.

Stjórnum því hvað við geymum og hve lengi!

Afkastameira gagnageymslukerfi þarf ekki að þýða stærri diska og öflugri örgjörva. Málið snýst frekar um að stýra því hvað við geymum, hvar og hversu lengi. Þannig nýtum við afl og geymslugetu kerfisins sem best til að sinna þeim gögnum sem eru á hápunti ævinnar þá stundina. Með því að skipta gagnageymslukerfum upp í misafkastamikla og misdýra geymslumiðla má ná bæta geymslunýtingu og auka afköst. Einnig eykst skilvirkni og nákvæmni á stýringu afritunar því gögn sem verður að geyma en má ekki breyta þarf ekki að afrita eins ört. EMC framleiðir í dag breiða línu diskakerfa sem bjóða uppá margar gerðir misöflugra miðla til að vista upplýsingar.

Vélbúnaður einn og sér nægir þó ekki til að ná fram sem mestri hagræðing á þessu sviði. Hugbúnaðargerð hefur því verið stór þáttur hjá EMC á undanförnum árum. Hugbúnaðarlausnir á borð við EmaiXtender og DiskXtender taka á þessum þáttum og færa sjálfvirkt upplýsingar milli geymslumiðla samkvæmt reglum sem fyrirfram eru ákveðnar af stjórnendum kerfanna. Hugmyndafræðin á bak við Information Lifecycle Management (ILM) er svo sem ekki ný af nálinni. Með síauknu gagnamagni og þeirri upplýsingasöfnun sem á sér stað í fyrirtækjarekstri nú til dags má ætla að innan fárra ára verði meðhöndlun þeirra gagna, sem við geymum, gjörbreytt og skipulagðari.

Nánari upplýsingar um ILM og gagnageymslulausnir EMC má fá hjá starfsmönnum Tæknivals og á heimasíðu EMC www.EMC.com.