Vefnotendur hafa mismikla reynslu í notkun Netsins og því er mikilvægt að uppbygging vefja og framsetning þeirra sé skýr og einföld. Talið er að allt að 10% af íbúum Evrópu eigi við einhvers konar fötlun að stríða og ætla má að verulegur hluti þeirra þarfnist sérstakrar aðstoðar eða hjálpartækja til að nýta sér vefinn svo vel sé. Einnig fjölgar eldri borgurum í Evrópu stöðugt. Árið 1990 var hlutfall þeirra sem eru eldri en 60 ára um 18% og er gert ráð fyrir að árið 2030 verði hlutfallið komið upp í 30% af íbúafjölda.

Gefa þarf gaum að þörfum þessara hópa og gera vefina þannig úr garði að fólk með mismunandi þarfir eigi auðvelt með að nýta sér efni þeirra. Raunin er sú að flest af því sem talið er að auðveldi aðgengi fatlaðra að Netinu nýtist ekki síður öðrum almennum notendum. Er þá til dæmis átt við óörugga tölvunotendur, útlendinga sem eru búsettir á Íslandi og hafa ekki fullt vald á íslensku, einstaklinga með þroskafrávik og fleiri.

Við gerð vefsíðna þarf að gæta þess að unnt sé að skoða þær þótt mismunandi tækni sé beitt. Til dæmis á ekki að skipta máli hvort notandi beitir mús, lyklaborði, rödd, fingri eða öðru þegar flakkað er um vefinn. Ganga þarf úr skugga um að allar síður séu skýrar og einfaldar svo auðvelt sé að átta sig á uppbyggingu þeirra. Það nýtist öllum notendum að samræmis sé gætt í framsetningu þeirra þátta sem setja svip sinn á vefinn. Skýrt og einfalt málfar sem um leið hæfir viðkomandi vef er líklegra til að ná til notenda sem einhverra hluta vegna eiga erfitt með að skilja flókinn texta. Þeir sem nota táknmál eiga einnig auðveldara með og eru fljótari að túlka það sem textinn segir ef hann er hnitmiðaður og skýr.

• Um aðgengismál í Vefhandbókinni
• Skýrsla um aðgengi allra að vefnum (PDF - 176Kb) - janúar 2006
  Skýrslan er unnin af forsætisráðuneyti og félagsmálaráðuneyti og eru þar lagðar fram tillögur um aðgerðir sem stuðla að því að fatlaðir og aðrir hópar sem gefa þarf sérstakan gaum í upplýsingasamfélaginu geti nýtt sér þjónustu á Netinu. Ákveðið hefur verið að fara að þeim tillögum sem lagðar eru fram í skýrslunni og stefna að því að allir opinberir vefir á Íslandi uppfylli ákveðnar lágmarkskröfur í aðgengismálum.
  
• Aðgengi að opinberum vefjum á Íslandi. Sjá: Hvað er spunnið í opinbera vefi 2011?
• W3C/WAI (World Wide Web Consortium/Web Accessibility Initiative)
• Section 508 of the Rehabilitation Act Amendments of 1998 (Bandaríkin)
• Leiðbeiningar um gerð aðgengilegra PDF skjala úr OpenOffice skjölum (PDF)
• Leiðbeiningar um gerð aðgengilegra PDF skjala úr Word skölum (PDF)
• Leiðbeiningar um gerð aðgengilegra PDF skjala úr Word skjölum (DOC)

Hjálparforrit

• Viðbót (add-on) við Firefox - HTML Validator
• WAT-C Web Accessibility Tools Consortium
• Web Accessibility Toolbar (tækjastika fyrir Internet Explorer). Athugar vélrænt aðgengileika vefsíðna, meðal annars með tilliti til lita, HTML, CSS, tengla, mynda, uppbyggingar og fleira.