3.1 Leiðarkerfi

3.1.1 Leiðarkerfi þarf að vera skýrt og auðvelt í notkun

Uppsetning og góð ráð

Það er gott að tileinka sér ákveðnar vinnureglur þegar leiðarkerfi er sett upp:

Gæta skal samræmis í leiðarkerfinu og ekki láta það breytast eða færast á milli staða á undirsíðum.
Forðast eins og kostur er að hanna leiðarkerfi með framsetningu myndrænna tengla. Textatenglar eru alltaf betri kostur sérstaklega vegna aðgengismála.
Ekki byggja leiðarkerfi sem er háð Javascript-staðlinum því vefurinn þarf að virka fyrir vafra sem ekki styðja staðalinn.
Gefið greinilega til kynna hvaða í hvaða vefflokk notendur séu hverju sinni, t.d. með feitletrun á texta í veftré.
Heiti flokka í veftré skulu vera stutt og hnitmiðuð.

Aðrar framsetningar

Það er alltaf gott að gefa notendum færi á að leita að efni á annan máta.

Atriðaorðaskrá eða A-Z listi yfir efnisflokka vefsins getur verið til hagsbóta fyrir notendur. Þetta gæti hentað stórum og efnismiklum vefjum sérlega vel.
Notkun brauðmolaslóða er önnur leið sem sýnir notendum hvar þeir eru staddir á vefnum hverju sinni.

Brauðmolaslóð fyrir þessa síðu sem fjallar um leiðarkerfi vefja er eftirfarandi:

Forsíða > Vefhandbók > 3. Notagildi og viðhald > 3.1 Leiðarkerfi

Notendur geta því áttað sig betur á hvar þeir eru staddir í veftrénu og geta auðveldlega vafrað til baka og á milli flokka. Þessi slóð er yfirleitt sett efst á hverja síðu og er breytileg eftir því hvar notendur eru staddir hverju sinni.