UT-dagurinn er 8. mars
Dagur upplýsingatækninnar 8. mars 2007
Forsætis- og fjármálaráðuneyti standa að undirbúningi UT-dagsins sem haldinn verður 8. mars nk. Lögð verður áhersla á mikilvægi upplýsingatækninnar sem verkfæris til að minnka skriffinnsku, spara tíma og auka hagræði. Ýmislegt er á döfinni í tengslum við UT-daginn. Á ráðstefnu sem haldin verður í Salnum í Kópavogi í tilefni dagsins verða kynnt nokkur af stærstu verkefnum ríkis og sveitarfélaga í rafrænni stjórnsýslu. Yfirskrift ráðstefnunnar er „Nýtum tímann – Notum tæknina,“ og verður þar fjallað meðal annars um rafræn skilríki, vefinn Ísland.is og rafræn innkaup. Þann 3. mars verður gefið út efnismikið blað, UT-blaðið, þar sem einnig verður fjallað um nokkur mikilvæg verkefni í rafrænni stjórnsýslu.
Þetta er í annað skipti sem UT-dagurinn er haldinn, en sá fyrsti fór fram 24. janúar 2006. UT-dagurinn verður að þessu sinni haldinn í tengslum við sýninguna Tækni og vit 2007, fagsýningu tækni- og þekkingariðnaðarins, sem mun fara fram í Fífunni í Kópavogi dagana 8. - 11. mars. Gestum ráðstefnunnar í Salnum er jafnframt boðið á opnun Tækni og vits, sem hefst kl. 17:00. Ráðstefnan er öllum opin en tilkynna þarf þátttöku á skraning@appr.is .(Sjá fréttatilkynningu frá 26. febrúar)
Dagskrá UT-dagsins verður jafnframt send út beint á Netinu á vefnum www.ut.is.
Áhugaverðir viðburðir sem tengjast UT-deginum og sýningunni Tækni og vit:
3. mars UT-blaðið gefið út.
7. mars Opnun þjónustuveitunnar Ísland.is.
8. mars Ráðstefnan Nýtum tímann – Notum tæknina sem haldin er af forsætis- og fjármálaráðuneyti í Salnum, Kópavogi.
9. mars Ráðstefna um samskipti frumkvöðla og fjárfesta sem haldin er af Samtökum iðnaðarins í Salnum, Kópavogi.
9. mars Tilkynnt verður um afhendingu Vaxtarsprotans, sérstakra verðlauna til sprotafyrirtækja sem skilað hafa góðum árangri, kl. 18, í Gerðarsafni, Kópavogi.
8.-11. mars Sýningin Tækni og vit í Fífunni, Kópavogi. Sýningin er skipulögð af AP almannatengslum og gefur breiður hópur sýnenda fyrirheit um góða sýningu. Fjármála- og forsætisráðuneyti verða meðal sýnenda og kynna m.a. vefinn Ísland.is og rafræn skilríki.