1.3.1 Vefumsjónarkerfi

Val út frá þarfagreiningu

Kröfurnar til vefumsjónarkerfa byggja fyrst og fremst á þarfagreiningu sem þarf að vera lokið á þessu stigi en eftirfarandi lágmarkskröfur má þó miða við í útboðum, verðfyrirspurnum og að lokum í samningum við birgja:

• Tryggja þarf að vefumsjónarkerfið uppfylli og haldi utan um vefinn þannig að gátlisti „WCAG 1.0 A“ um aðgengi sé uppfylltur.
• Auðvelt sé að skrifa„alt“ texta með myndum.
• Kerfið má ekki nota töflur í hönnun eða umbrot.
• Þegar nota á töflur til að koma upplýsingum á framfæri þarf kerfið að auðvelda umsjónarmönnum að stilla þær rétt, t.d. með hausum th-tag og summary.
• Kerfið verður að styðja við notkun á hausum í meginmáli texta, haus í efsta lagi sé merktur með h1 o.sfrv.
• Tryggja þarf að kerfið sem heldur utan um vefinn sé að varpa síðunum fram í „stöðluðum“ kóða frá W3C, eins og HTML XHTML.
• Vefslóðir sem vefumsjónarkerfið býr til fyrir síður mega ekki vera illlæsilegar.
• Mikilvægt er að title-tag sé stillanlegt eftir vefsíðum á vefnum og sé ekki sjálfvirkt gert af kerfinu.

Val út frá aðgengismálum

• Til að ganga úr skugga um að vefumsjónarkerfin uppfylli aðgengiskröfur er hægt að prófa vefsvæði sem vitað er að nota tiltekið kerfið með „prófunum“ hjá W3C.
• Þá ber að gæta þess að umsjónarkerfið tryggi gott aðgengi í símum, 3G símum og lófatölvum. Vefurinn sé tæknilega í lagi óháð því hvaða vafrar gestir vefsins nota. Kerfin þurfa enn fremur að geta aðskilið á milli útlits og innihalds og styðja við „CSS staðalinn“.
• Æskilegt er að birgjar geti afhent kaupendum skriflegar leiðbeiningar/notendahjálp við afhendingu kerfis.
• Rétt þykir að gera kröfur um aðgangsstýringu vefkerfis og að mögulegt sé að skoða vefsíður.
• Huga þarf að þróun vefsvæðisins til framtíðar, hversu langt á að ganga í rafrænni þjónustu og hvernig kerfið komi til með að aðlagast að öðrum verkefnum og tengingar við gagnagrunna.
• Vefkerfið auðveldi notendum að setja inn tungumálabreytingar í texta.
• Vefkerfið sé með flýtileið til að setja inn skýringar með skammstöfunum.

Val út frá notendasjónarmiðum

• Framkvæma má þarfagreiningu til að átta sig á þörfum notenda og þar með hvaða kröfum kerfið eigi að mæta.
• Lagt er til að stofnanir/sveitarfélög leiti til ytri ráðgjafa í mati á valkostum ef nauðsynleg þekking er ekki til staðar innan stofnunar.

Gæta þarf þess að fylgja reglum um opinber innkaup. Tryggja þarf að opinberum fjármunum sé varið á sem hagkvæmastan hátt.

Mikilvægt er að gleyma ekki að hugsa til framtíðar, þó svo að verkefnið sem eigi að framkvæma sé lítið í sniðum í upphafi má oft gera ráð fyrir aukinni kröfu notenda um gagnvirkni til framtíðar litið.

Meta þarf gæði og kröfur til þjónustuaðila þrátt fyrir að verðfyrirspurn sýni lægsta verð á tiltekinni þjónustu.

Ítarefni

• Prófunarsíða W3C
• Upplýsingar um opinber innkaup (upplýsingavefur fjármálaráðuneytis)